La boya oceanográfica de la Universidá d'Uviéu, asitiada a unos 4 kilómetros al nordés del puertu de Cuideiru, rexistró una fola de 20.87 metros d'altor el domingu 2 de febreru, ente les 00:00 y les 01:00 hores de la madrugada (hora local).

Nesi mesmu periodu de tiempu l'altor significativu de la fola --un parámetru que da una idea del altor aparente del aguaxe--  foi de 10.54 metros. A pesar de la so proximidá a la mariña, onde les foles suelen perder altor, esta fola foi tan solo 6 metros inferior a la gran fola de 26.13 metros rexistrada pola boya Augusto González de Llinares del Institutu Español d'Oceanografía a 40 kilómetros al norte de Santander el 24 de xineru de 2009, y quédase a escasos 21 centímetros del altor necesariu pa ser clasificada como "fola xigante". 

El vientu más intensu nesta franxa de la mariña no que va d'envernada produció'l 4 de febreru ente les 16 y les 17 hores, con una velocidá media de 63 km/h y rabaseres de 85 km/h a nivel del mar. Nesi momentu l'altor significativu de la fola yera de 2.72 metros algamar un altor máximu de 4.35 metros. La boya oceanográfica instalada na mariña de Cuideiru ye un equipamientu universitariu del Campus d'Excelencia Internacional. Esti preséu dispon d'un conxuntu de sensores meteorolóxicos y oceanográficos qu'apurren información a tiempu real sobre los nutrientes, el plancton y les corrientes marines.