La Xornada ‘Más qu'un aprendizaxe: 40 aniversariu de los cursos intensivos tándem Uviéu-Bochum’ sirvió para celebrar l'ésitu y l'afitamientu d'una iniciativa pionera na institución académica asturiana | El métodu tándem fai alusión al trabayu colectivu en pareyes billingües, onde cada unu de los miembros apriende la llingua del otru | La vicerrectora de Internacionalización, Ana Suárez, estimó'l trabayu incansable del personal de dambes universidaes para garantizar la continuidá d'un programa que solo se vio atayáu mientres la pandemia del coronavirus
Una esperiencia innovadora, motivadora y efectiva para aprender idiomes que cumple cuatro décades d'hestoria na Universidá d'Uviéu. El salón de graos de Filoloxía Clásica y Románica, nel Campus d'El Milán, acoyó esti vienres la Xornada Más qu'un aprendizaxe: 40 aniversariu de los cursos intensivos tándem Uviéu-Bochum, col que la Área d'Alemán del Departamentu de Filoloxía Inglesa, Francesa y Alemana celebró l'ésitu y l'afitamientu d'un programa pol que pasaron más de 4.000 persones a lo llargo d'estos años.
El métodu tándem fai alusión al trabayu colectivu en pareyes billingües, onde cada unu de los miembros apriende la llingua del otru. Empezó a esperimentase nel ámbitu universitariu a principios de la década de 1980 ya introducióse na Universidá d'Uviéu en 1984 gracies a la collaboración cola Ruhr-Universität Bochum. De magar, el cursu intensivu tándem español/alemán viénose celebrando de forma añal con una única interrupción, motivada pola pandemia del coronavirus.
La Xornada, entamada por Christina Jurcic y Mónica Sánchez, tuvo presidida pola vicerrectora de Internacionalización, Ana Suárez, quien estimó'l trabayu incansable del profesoráu para caltener el programa a lo llargo de los años. “Detrás del ésitu d'estos cursos atopa'l trabayu, non siempres senciellu y non siempres reconocíu, de docentes, coordinadores, personal alministrativo, departamentos, decanatos y rectoraos de dambes universidaes”, reconoció Suárez antes de sorrayar la importancia d'esti programa pa la Universidá d'Uviéu.
Afechu al contestu académicu ensin perder la so esencia inicial
La iniciativa foi frutu de la collaboración ente la Universidá d'Uviéu y la Ruhr-Universität Bochum d'Alemaña y empezó en 1984 gracies, en gran midida, al estensu llabor de Helmut Brammerts, entós docente ya investigador del Seminar für Sprachlehrforschung de la universidá alemana, onde los cursos empezaron a celebrase a partir de 1990. Cientos d'estudiantes de dambes nacionalidaes beneficiáronse dende entós d'estos cursos, ameyorando'l so nivel d'español o alemán, en función de los sos oxetivos, según les sos conocencies de cultura.
A lo llargo d'estos 40 años, los Cursos Intensivos Tándem Uviéu-Bochum afixéronse en función del cambiante contestu académicu y de les resultancies de la investigación, pero siempres calteniendo la so esencia inicial, daqué que s'encetó mientres la xornada celebrada esti vienres, na que participaron espertos de la Universidá d'Uviéu, de la Ruhr-Universität Bochum, de la Universidá de Granada y de la Universidá de Sevilla.
A lo llargo de la Xornada, tratóse la tema de l'autonomía del alumnáu de llingües estranxeres, unu de los principios que sofiten el trabayu en tándem. Amás, estudiantes que participaron nel programa a lo llargo de los años cuntaron les sos esperiencies de primera mano. Les persones asistentes pudieron conocer los postreros resultaos n'investigación nesti ámbitu, como la integración progresiva del asesoramientu llingüísticu o la introducción d'intelixencia artificial, según les esperiencies del programa n'otres universidaes.
Pie de semeya:
D'esquierda a derecha: Lennart Koch (UO), Paula Salas (RUB), Tim Hammrich (UO), Bea Friedel (RUB), Mónica Sánchez (UO), Margarita Blanco (UO), Christina Jurcic (UO) y Steffanie John (UO).
