Un estudiu multicéntrico coliderado por un investigador del Institutu d'Investigación Sanitaria del Principáu d'Asturies (Ispa), la Fundación para la Investigación y l'Innovación Biosanitaria del Principáu d'Asturies (Finba) y l'Universidá d'Uviéu, demostró una relación evidente ente la necesidá de ventilación mecánica enllargada y la perda de capacidá d'aireación de los pulmones de los pacientes pediátricos gravemente enfermos.

L'afayu del estudiu que se conoz como LUS PICU, acrónimo del inglés Lung ultrasound score-pediatric intensive care outcomes, sirve agora pa detectar aquellos casos más graves que pueden riquir d'un tratamientu más intensivu pa evitar una ventilación mecánica enllargada y distintos entueyos acomuñaos a una mayor duración de los ingresos nes unidaes de cuidos intensivos pediátriques.

Estes conclusiones llográronse por aciu la inclusión nel estudiu de más de 500 neños graves ingresaos en cuidos intensivos, a los cualos realizábase-yos xuna ecografía a cuerpu de cama a les 12 hores del ingresu, y xuna segunda ecografía a les 48-72 hores, valorando'l grau d'aireación de los sos pulmones. 

El grupu d'investigación qu'algamó estes conclusiones pertenez al Centru d'Investigación Biomédica en Rede (CIBER) d'Enfermedaes Respiratories que lidera'l doctor Guillermo Muñiz Albaiceta, director científicu del Ispa. 

L'artículu Lung Ultrasound Score, Severity of Acute Lung Disease and Prolonged Mechanical Ventilation in Children contien xuna parte de les resultancies del estudiu multicétrico LUS-PICU foi publicáu na American Journal of Respiratory and Critical Care Medicine, xuna de les revistes más prestixoses del mundu nel ámbitu de los cuidos intensivos que, de forma escepcional, espubliza artículos pediátricos.

Nel estudiu participáu un total de 24 unidaes de cuidos intensivos pediátriques españoles y xuna portuguesa, y foi coliderado polos doctores Juan Mayordomu Colunga, investigador del ISPA, intensivista pediátricu nel Hospital Universitariu Central d'Asturies (HUCA) y profesor acomuñáu de la Facultá de Medicina de la Universidá d'Uviéu; ya Ignacio Oulego Erroz, pediatra especializáu en cardioloxía pediátrica y cuidos intensivos pediátricos nel Centru Asistencial Universitariu de Llión.

L'estudiu forma parte de la tesis doctoral de la doctoranda Pilar de Castru Vecín, nel que s'incluyeron un total de 538 neños ingresaos en cuidos intensivos. 

La ecografía pulmonar clínica o a cuerpu de cama ye capaz d'envalorar d'una manera non invasiva, fiable y ensin irradiación (como sí produz la radiografía convencional y la tomografía computadorizada o scanner), la cantidá de “líquidu” qu'hai nos pulmones.

Según esplica'l doctor Mayordomu, “un pulmón sanu nun tien prácticamente líquidu, sinón que ta llenu d'aire casi al completu. Sicasí, cuando hai xuna inflamación, xuna neumonía grave, por casu, atrópase líquidu nos pulmones”. De la mesma forma, cuando'l corazón o los reñones nun funcionar bien, los pulmones tamién atropen líquidu y pierden aireación. Poro, “el líquidu nos pulmones ye un bon reflexu del dañu grave que se produz n'otres partes del organismu en neños graves”. 

Esti tipu d'ecografía esperimentó xuna enorme espansión arriendes de la pandemia pola COVID-19, pos sirvía d'ayuda pa envalorar la afectación pulmonar de los pacientes, xeneralmente adultos d'edá avanzada.

Tamién demostró ser útil pa conocer la causa y la gravedá de la dificultá respiratoria qu'apaez nos naciellos, fundamentalmente nos prematuros, de forma que ye indicador del tipu de tratamientu que precisen. Hasta agora, el beneficiu del usu de la ecografía pulmonar en neños graves mayores d'un mes estudiárase escasamente.