La Universidá d'Uviéu y ArcelorMittal anovaron güei el conveniu de collaboración que va dexar financiar la Cátedra ArcelorMittal de Descarbonización ya Industria Sostenible mientres los próximu cuatro años. La firma, que tuvo llugar nel Centru de Servicios Universitarios d'Avilés, inclúi una aportación económica total de 160.000 euros per parte de la empresa, una cuantía que se va estremar en 40.000 euros añales.

L'alcuerdu ente la institución académica y l'empresa inclúi dellos ámbitos d'actuación ente los que destaca la investigación, p'avanzar na descarbonización y na transición escontra una industria sostenible na producción d'aceru. Nesti sentíu, van encetase aspeutos tan diversos como les tecnoloxíes llimpies, el tresformamientu de les cadenes de suministru escontra modelos sostenibles, la digitalización y l'usu de la intelixencia artificial pa optimizar la eficiencia enerxética o la integración de práctiques ambientales en tolos aspeutos de la industria, en busca d'una economía baxa en carbonu y más respetuosa col mediu ambiente. Les actividaes van venceyar coles instalaciones d'investigación de la mesma empresa, bien especialmente al traviés del HUB del Hidróxenu, xuna iniciativa financiada pol Principáu d'Asturies y que cunta con un elementu diferencial a nivel mundial.

Amás de la investigación, la Cátedra ArcelorMittal de Descarbonización ya Industria Sostenible inclúi llabores formativos cola empresa, tanto al traviés d'actividaes específiques d'interés común como de formación especializada pa profesionales cualificaos. Tamién se van desenvolver llabores d'espardimientu y van abrise llínees de collaboración ente la empresa y el profesoráu y estudiantáu de la universidá, incluyendo la realización de trabayos de fin de grau y máster, práctiques o convocatories de premios.

Compromisu cola tresferencia de conocencia

El rector de la Universidá d'Uviéu, Ignacio Villaverde, foi l'encargáu de roblar el conveniu cola compañía acerera, nun actu nel que participaron el South Research Centres Leader de ArcelorMittal R&D, Charres de Abreu Martins, el conceyal de Desenvolvimientu Urbanu y Económicu d'Avilés, Manuel Riola, y el director de la cátedra, Francisco de Asís Ortega Fernández. Na so intervención, el máximu responsable de la institución académica asturiana celebró la intención espresada pola empresa d'intensificar la collaboración ente dambes entidaes. “La tresferencia de conocencia ye unu de les nueses exes estratéxiques. Estos años fortalecimos les relaciones con empreses hasta algamar los 500 alcuerdos de collaboración y amontar el númberu de cátedres hasta les 44”, sorrayó Villaverde.

Amás, l'actu cuntó cola presencia de la vicerrectora de Tresferencia y Relaciones cola Empresa, Susana Luque; el director xerente de la Fundación Universidá d'Uviéu, Santiago Fernández; el director d'área de Tresferencia y Empreses basaes na conocencia, Jorge García; la directora d'área de Cátedres d'Empresa ya Institucionales, Verónica Cañal, y la directora de la Escuela Politécnica d'Inxeniería de Xixón, Inés María Suárez Ramón. Per parte de ArcelorMittal, participaron na firma la directora d'operaciones d'I+D n'España, Tatiana Mansu, y el director de los servicios Cros-Funcionales d'I+D n'España y Portugal, José Ramón Laso.

“L'activación de la Cátedra ArcelorMittal de Descarbonización ya Industria Sostenible supon un pasu adelantre na amplia collaboración que dende va décades desenvolvieron la empresa y l'Universidá d'Uviéu, bien especialmente en materia d'investigación y desenvolvimientu”, destacó'l director. Nesta nueva etapa, dambes partes decidieron focalizar el trabayu nun aspeutu clave pa la economía del futuru, el camín escontra una industria sostenible y descarbonizada.

Pa ello, la cátedra pretende sirvir de puntu d'alcuentru ente tolos axentes implicaos nel procesu, incluyíos centros d'investigación, startups, empreses con soluciones pal sector, estudiantáu ya investigadores de la universidá. Amás, va tar fuertemente amestada a Avilés, onde la empresa cunta con unu de los sos mayores centros d'investigación a nivel mundial, con más de 300 investigadores. 

Los detalles del conveniu

El conveniu inclúi'l compromisu de la empresa de dotar a la Cátedra ArcelorMittal de Descarbonización ya Industria Sostenible de 40.000 euros añales pa llevar a cabu los trabayos alcordaos. Un montante que puede amontase si la compañía asina la decide pa faer frente a gastos derivaos d'acciones estraordinaries.

Pela so parte, la Universidá d'Uviéu va ser la encargada de disponer del personal y los medios necesarios pa la puesta en marcha del conveniu. Xuna comisión de siguimientu va planiar y va supervisar l'actividá de la cátedra y, nel so casu, va emitir un informe que xustifique la so prórroga más allá de los cuatro años de vixencia inicial.