L'Aula José Gaos, allugada nel Edificiu Históricu de la Universidá d'Uviéu, tresformóse nun espaciu de trabayu para los equipos d'investigación de la institución académica. Esti anováu allugamientu foi inauguráu güei por Ignacio Villaverde, rector de la Universidá d'Uviéu, cola presencia de Fausto González, director de Biblioteca Universitaria, y María José Ferrer, responsable de la Biblioteca Central de la institución académica asturiana.

La nueva sala, según esplicó'l rector, da respuesta a una necesidá de la Biblioteca Central de la Universidá d'Uviéu y resuelve amás un déficit históricu de la institución. L'espaciu inauguráu güei ufierta dos ventayes. Primero, dispon d'una gran cantidá de metros d'estanteríes para asitiar afechiscamente munchos llibros, lo que llibera sitiu na biblioteca. Y, segundu, alluga una sala d'investigadores, que va dexar que puedan trabayar en grupu ensin fadiar a les persones qu'alleguen hasta la Sala d'Asturies de la biblioteca del Edificiu Históricu.

La nueva sala, según indicó Fausto González, alluga más de 4500 volumes pertenecientes a la colección especial, formada por ediciones facsimilares, artístiques y d'autor, a la colección d'Hestoria d'América, la colección Seminariu d'Arte y la colección d'Asturies. Para ello, foi necesariu non solo escoyer y treslladar físicamente los llibros, sinón dotalos de nueva signatura topográfica y camuda-yos el tejuelo. 

María José Ferrer indicó que, con esta inauguración, pretende dase a conocer la nueva función d'esti espaciu a la comunidá universitaria por que el investigadores sepan que, d'equí p'arriba, tienen a la so disposición un llugar cómodo y curioso por que puedan avanzar nos sos trabayos. 

L'Aula José Gaos, que nel so día acoyera la Llibrería Universitaria, anguaño allugada nel Palaciu de Quirós, empezó'l so tresformamientu n'abril de 2022, cuando allugó una curtia esposición na que s'amosaron los siete llibros, seis d'ellos incunables, donaos a la Biblioteca Universitaria por Carlos López-Fanjul, profesor xubiláu de la Universidá Complutense de Madrid, nacíu n'Uviéu. 

De magar, el personal de la biblioteca foi trabayando para afaer l'Aula José Gaos al so nuevu cometíu como sala d'investigadores. Para ello, utilizáronse toles estructures non desmontables de l'antigua Llibrería Universitaria, amás d'otru moblame. Dotóse tamién a l'aula d'un sistema de protección nes ventanes para evitar que'l sol estropie los llombos de los llibros y de un deshumidificador que consigue caltener les condiciones de mugor nes llendes aceptables para'l caltenimientu de los exemplares.