Un grupu d'investigación integráu por profesionales de la Universidá d'Uviéu y del Serviciu de Salú del Principáu d'Asturies (Sespa) desenvolvió un xuegu de rol, denomináu MASSCAS-GAME, para ameyorar la formación de los profesionales sanitarios énte incidentes con múltiples víctimes. Esti xuegu ta dirixíu a distintos perfiles profesionales, dende especialistes d'atención primaria hasta especialistes de servicios d'emerxencia, y tien por oxetivu ameyorar la so formación nos principios fundamentales de la respuesta prehospitalaria énte estos accidentes. El tableru de simulación foi escurríu pol Grupu d'Investigación n'Asistencia Prehospitalaria y Desastres (GIAPREDE), dirixíu pol Dr. Rafael Castro y formáu por profesionales d'universidá asturiana y del Sespa, xuntu con collaboradores de País Vascu (Bioef/Emerxencies Osakidetza) y Cataluña (Asociación Disaster Rol). Pal so diseñu y desenvolvimientu, cuntaron amás cola ayuda de la empresa de xuegos creativos Picu-Pao de Zamora y la Cátedra MediaLab de la Universidá d'Uviéu.

El xuegu representa sobro un tableru distintos escenarios d'incidentes con múltiples víctimes, incluyendo la identificación de peligros y dexa a quien participen nél dir esplegando distintos recursos y estructures de respuesta pa, gracies a la información proporcionada pol instructor, tomar decisiones que faciliten la coordinación ente los distintos intervinientes. D'esta manera, trabayar el procesu de toma de decisiones en redolaes complexes, según les habilidaes de lideralgu y trabayu n'equipu.

El xuegu tien unos determinaos oxetivos d'aprendizaxe en función de los profesionales que lu utilicen, lo qu'aumenta'l so valor añedíu como ferramienta innovador na formación énte incidentes de múltiples víctimes. El Dr. Capo destaca que la metodoloxía que dio llugar a esti xuegu lleva usándose 10 años con estudiantes de Medicina de la Universidá d'Uviéu y foi reconocida como proyectu d'innovación docente. La primer esperiencia formativa col nuevu xuegu va realizar con profesionales d'atención primaria d'Asturies.

El director del grupu d'investigación añede, amás, que la esperiencia d'usu con estudiantes de Medicina foi publicada na revista estadounidense Disaster Medicine and Public Health Preparedness. “Con esta iniciativa, ponemos de manifiestu la importancia de combinar innovación docente con investigación y cola xeneración d'idees innovadores que tienen una torna nel procesu formativu de los nuesos profesionales de la salú y nel sistema sanitariu. Magar tendemos a faer una asociación ente innovación y tecnoloxía, non necesariamente debe de ser asina”, sorraya Rafael Castro, profesor del Departamentu de Medicina de la Universidá d'Uviéu. 

El director de GIAPREDE destaca, amás, que nuna recién visita de responsables del Programa d'Emerxencies de la Organización Mundial de la Salú (OMS) n'Ucrania y del Ministeriu de Salú d'esti país, manifestaron el so interés nel xuegu dada la so facilidá d'usu, les sos distintes aplicaciones y el so baxu costu en comparanza con otros sistemes de simulación. 

Esti proyectu cunta con financiamientu del Institutu d'Investigación Sanitaria del Principáu d'Asturies (ISPA) dientro de la convocatoria empobinada grupos d'atención primaria.