Fortalecer los llazos ente la investigación universitaria y el sector granible rexonal. Este ye'l principal oxetivu que se plantega l'I Foru de Tresferencia de la Universidá d'Uviéu, que foi inauguráu güei na Escuela Politécnica d'Inxeniería del Campus de Xixón. Esti alcuentru surde como respuesta a la demanda constante del texíu empresarial asturianu.

La inauguración d'esti espaciu d'alcuentru ente la universidá y l'empresa cuntó cola presencia d'Ignacio Villaverde, rector electu de la institución académica; Begoña Cueto, vicerrectora de Tresferencia y Relaciones cola Empresa en funciones, Jorge García, director d'área de Tresferencia y Cátedres d'Empresa; Inés Suárez, directora de la Escuela Politécnica d'Inxeniería de Xixón, Cristina González Morán, directora xeneral d'Universidá del Gobiernu d'Asturies, y Carla Álvarez Sanjurjo, directora xeneral de Promoción d'Empléu del Conceyu de Xixón.

Ignacio Villaverde destacó que la institución que representa ye cada vez más consciente de la necesidá d'estrechar los llazos ente los grupos d'investigación universitarios y el texíu empresarial asturianu. Villaverde, qu'estimó'l trabayu del Vicerrectorado de Tresferencia y Relaciones cola Empresa, sorrayó que “esti foru preséntase como xuna plataforma pa esibir les capacidaes de los nuesos grupos d'investigación énte les empreses ya instituciones autonómiques, col propósitu de fomentar una mayor comprensión, reconocencia y collaboración, lo mesmo que de xenerar nueves oportunidaes de tresferencia de conocencia”. 

La vicerrectora añedió que, con esti espaciu d'alcuentru, “averamos les resultancies de les investigaciones más recién llevaes a cabu polos nuesos equipos en diverses disciplines de múltiples ámbitos de conocencia”. Cueto añedió que'l foru espertó gran interés ente'l texíu empresarial como lo demuestra'l fechu de que más de 30 empreses ya instituciones confirmaron la so participación.

Mientres esti alcuentru, les empreses ya instituciones participantes van tener la oportunidá d'interactuar con investigadores de diverses disciplines, visitar llaboratorios, reparar prototipos de proyectos, espandir les sos redes profesionales y xenerar sinergias, ampliando asina les sos oportunidaes d'innovación y desenvolvimientu.

Pela mañana, les empreses comenenciudes van tener ocasión d'interactuar directamente col personal investigador al traviés de presentaciones en pósteres y prototipos, que tomen un ampliu espectru de disciplines técniques y sociales. Nesta primer edición, inscribiéronse 24 grupos d'investigación na modalidá de paneles, xuntu con cuatro demostradores adicionales. Amás, los asistentes van poder realizar visites empuestes a siete llaboratorios pa guardar, de primera mano, les meyores n'investigación.

El foru va concluyir con un aperitivo networking nel Edificiu Polivalente de la Escuela d'Inxeniería de Xixón, que va facilitar l'establecimientu de redes profesionales ente los participantes y va promover sinergias ente empreses y especialistes de diverses árees científiques.  “Esperamos qu'estes conexones resulten en collaboraciones futures d'altu valor económicu y social pa la nuesa rexón y el so desenvolvimientu”, concluyó la vicerrectora.