El grau n'Inxeniería Informática del Software de la Escuela d'Inxeniería Informática de la Universidá d'Uviéu llogró la renovación del sello EURO-INF, que certifica l'alta calidá de los estudios acordies con estándares internacionales. L'Axencia Nacional d'Evaluación y Acreditación (ANECA) dio'l vistu bonu a la renovación d'esta reconocencia hasta xunetu de 2028.

José Miguel Arias, vicerrector de Xestión Académica en funciones, destaca que l'informe final que dio lluz verde a esta renovación foi ellaboráu por una comisión d'espertos que realizó una visita al centru y analizáu les evidencies acomuñaes. Los criterios utilizaos son adicionales al procedimientu de renovación de la acreditación que tienen de pasar toles titulaciones. Los espertos validaron les resultancies del aprendizaxe, tocantes a la so alliniación colos estándares internacionales, la metodoloxía y coordinación docente y el plantel de profesoráu, y el soporte institucional proporcionáu, xuntu col insertamientu llaboral y el prestu de les persones implicaes. Sofitaron igualmente la garantía de la so sostenibilidá nel tiempu.

Fernando Álvarez García, director de la Escuela d'Inxeniería Informática, amuesa'l so prestu pola renovación del sellu, que foi otorgáu al títulu dende l'añu 2016 y que “pon de manifiestu l'altu grau de compromisu que'l personal, los axentes esternos y los órganos calidable caltienen dende va munchos años colos estudios y cola formación de los estudiantes”. Amás, recuerda que “esti compromisu tien tamién el so reflexu nel Máster Universitariu n'Inxeniería Web, que tamién cunta col sellu EURO-INF dende l'añu 2015”.

José Miguel Arias, vicerrector de Xestión Académica en funciones, recuerda que, nesti momentu, la Universidá d'Uviéu cunta coles siguientes reconocencies qu'acrediten los sos estudios: 

• Sellu d'Enseñances Non Presenciales y Híbrides (ENPHI) para'l grau en Xestión y Alministración Pública.
• Sellu EUR-ACE para los graos n'Inxeniería en Tecnoloxíes y Servicios de Telecomunicación y n'Inxeniería Eléctrica y para el máster universitariu n'Inxeniería de Mines.
• Sello EURO-INF para los graos n'Inxeniería Informática en Tecnoloxíes de la Información y n'Inxeniería Informática del Software y para los másteres universitarios n'Inxeniería Informática y n'Inxeniería Web. 

Amás, la Universidá d'Uviéu cunta con distinciones internacionales como la acreditación de la Association to Advance Collegiate Schools of Business (AACSB), llograda pola Facultá d'Economía y Empresa en mayu de 2022, y la de la Institution of Chemical Engineers (IChemE) del grau n'Inxeniería Química, llograda pola Facultá de Química en 2019. 

La institución académica, según avanza Arias, trabaya para llograr cinco nuevos sellos calidable en distintos estudios nos próximos meses.