¿Ye perxudicial para la salú dormir con plantes? ¿Hai que guardar dos hores de dixestión antes de metese na agua? ¿Pierde vitamines el zusmiu de naranxa si nun lo tomes rápido? ¿Ayuda beber agua bien frío pa quitar l'hipu? Son dalgunes de les creencies instauraes na sociedá que formen parte de la esposición urbana Mitos y lleendes de la sabiduría popular, que puede visitase nos campus universitarios d'Uviéu, Xixón y Mieres hasta'l 14 d'abril. L'amuesa, entamada pola Universidá d'Uviéu, tien por oxetivu ayudar a esclariar la validez o falta d'evidencia científica d'estes creencies. 

La esposición, patrocinada pol Ministeriu de Ciencia, Innovación y Universidaes, xuntu con Fundación Española pa la Ciencia y la Tecnoloxía (FECYT), incide n'aspeutos bien enraigonaos na sabiduría popular y ayuda a estenar duldes sobro la so veracidá o falsedá. Asina, podemos saber que dormir con plantes nun ye malu,     que poner una cebolla al pie de la cama nun sirve pa solliviar la conxestión nasal, qu'hai riesgos si comemos daqué del suelu, anque nun pasaren cinco segundos desque nos cayó o que ye falsu que, si nun alendamos, les ortigues nun picar. Asina, hasta un total de dolce mitos y lleendes qu'integren esta esposición.

Caúnu d'ellos ta acompañáu de referencies a la evidencia científica que sofita o refuga l'afirmación, xuntu con pequeñes rimas a manera de recordatoriu que refuercen la veracidá o falsedá del mitu o lleenda popular. Dalgunes d'estes rimas son: "La corte de dixestión nada tien que ver con un bon chapuzón", "Remedios de too tipu poco-y faen al hipu" o "Entemecer amoniacu y llexía puede arruinate el día". El conteníu d'esta campaña de concienciación social foi ellaboráu polos investigadores José Manuel Montejo Bernardo y Cuadonga Huidobro Fernández, de la Facultá de Ciencies de la Educación, y Alfonso Fernández González, de la Facultá de Química de la Universidá d'Uviéu.

Amás, como complementu a la esposición, establecióse una collaboración selmanal con una emisora de radio autonómica que va emitir con periodicidad mensual El Minutu del mitu, un espaciu nel que el ceadores, xuntu col investigador y divulgador Germán Orizaola, de la Facultá de Bioloxía de la Universidá d'Uviéu, van analizar los mitos y lleendes de la campaña.