Un estudiu lleváu a cabu por dos investigadores del Institutu Mistu d'Investigación en Biodiversidá (Universidá d'Uviéu-CSIC-Principáu d'Asturies) evidencia interacciones ente especies d'aves al traviés de los sos cantares en primavera. Hasta agora sabíase que'l cantar de les aves tenía la función principal de comunicase con exemplares de la so propia especie. Esta nueva investigación suxure que los cantares d'aves, en forma de coros, pueden alvertir a individuos de distintes especies d'un ambiente llibre de depredadores y, poro, aparente pa cantar. L'estudiu, qu'acaba de ser publicáu na revista Behavioral Ecology and Sociobiology, de máximu impactu na so área de conocencia, destaca la importancia de la diversidá d'especies y de soníos na naturaleza como protectores de los miembros de la comunidá.

El investigadores espliquen que les principales funciones de los cantares de les aves son atraer a les femes y señalar les llendes del territoriu individual. Cada especie tien un cantar distintivo qu'evolucionó pa comunicase colos individuos de la so propia especie. Sicasí, especialmente en primavera y mientres les primeres hores del día, ye bien común escuchar a munches especies distintes de páxaros que canten xuntes, formando coros. “Anque yá sabíamos que les aves canten pa comunicase colos individuos de la mesma especie, investiguemos por qué caltienen estos coros de múltiples especies, pa ver si tamién esisten interacciones ente especies distintes que coesisten nel mesmu sitiu”, comenta Federica Rossetto, investigadora del IMIB. En concretu, “analicemos qué tipu d'interacciones desenvuélvense, de evitación o de estimulación recíproca, p'acolumbrar posibles efectos negativos o positivos de la realización de coros”, añede. 

Grabaciones en Mieres, Uviéu, Ayer, L.lena y Llaviana

Con esti fin, el investigadores realizaron, primero, grabaciones pasives --ensin la estimulación de les aves-- nel so ambiente natural, asitiando grabadores automátiques nos montes de castañal nos conceyos de Mieres, Uviéu, Ayer, L.lena y Llaviana pa grabar l'actividá normal de les aves forestales que los habiten ensin fadia-yos cola presencia humana. “A partir d'estes grabaciones pudimos analizar les característiques acústiques de los cantares de les especies que tienden a asolapase. Atopemos que les especies que tienen un cantar más similar tienden a cantar en momentos distintos, ente que les que más canten xuntes son les especies con cantares más distintos ente sí”, indica la investigadora. Esta circunstancia puede debese a que, si les aves cantaren coles especies que tienen el cantar más paecíu, podría rexistrase xuna interferencia y el so cantar sería menos perceptible per parte, por casu, de les femes a les que'l machu quier cortexar. Otra manera, si'l cantar d'una especie coincide con un cantar bien distinto – por casu, un cantar agudo d'alta frecuencia que s'asolapa con unu grave de baxa frecuencia – el soníu puede percibise bien al escuchu d'otru páxaru, ensin interferencies.  

Amás, el investigadores testaron si, al escuchar los cantares de les otres especies, les aves atayaben el so cantar o si, al aviesu, aguiyábenlos a xunise a cantar. “Realicemos esperimentos d'emisión de soníu nos mesmos montes onde grabamos los cantares. Estos esperimentos consisten n'emitir al traviés d'un altavoz un cantar d'una de les especies que vive nesti hábitat. Mientres la emisión, podemos estudiar el cambéu del comportamientu de les otres especies d'aves que tán presentes nel llugar del esperimentu. Atopemos que, al escuchar el cantar d'otres especies, les aves empezaben a cantar. Había, poro, xuna estimulación debida al cantar d'otres especies”, comenta Paola Laiolo, tamién investigadora del IMIB. 

Xuna posible esplicación d'esti fenómenu tien que ver coles estratexes contra la depredación. “Les aves, cantando, pueden correr el riesgu de ser detectaes por depredadores, por casu, por aves rapazos o mamíferos carnívoros. Escuchar a otra especie cantar puede significar que l'ambiente ta llibre de depredadores y, de resultes, pue ser el momentu meyor de mano a cantar”, esplica Laiolo. “Amás, anque haya depredadores que nun fueron detectaos, cuantes más especies canten al empar y espónense a ser alcontraes poles rapazos, menor ye la probabilidá de ser depredadas”, añede.

La investigación reveló tamién que los cantares emitíos al traviés del altavoz que desencadenaron más respuestes yeren los menos similares a los de les otres especies. Poro, amás d'aplicar una estratexa contra el depredadores, paez que les aves actúen siguiendo'l patrón que s'atopó colos datos de grabaciones pasives. Entá aguiyaos polos cantares d'otres especies, l'enclín ye intentar qu'el so proprio cantar nun s'asolape a otru cantar que podría amazcarar el mesmu. “Esti comportamientu representaría un compromisu ente intentar nun ser detectáu polos depredadores y entós cantar coles otres especies, per un sitiu, y asegurar qu'el so cantar sía bien percibíu por aquellos que tienen de recibilo, por casu, la fema nel casu del cortexu, por otru.  Entós, xuna mayor riqueza d'especies d'aves que canten al empar nesti casu nun implicaría mayor competición, sinón potenciales beneficios por cuenta de la presencia de les otres especies, y cantares, protectores”, conclúin dambos investigadores.
 

Referencia
Rossetto, F., & Laiolo, P. (2024). Potential social facilitation through song in bird communities. Behavioral Ecology and Sociobiology, 78(1), 10.
https://doi.org/10.1007/s00265-023-03427-2

Este estudio se ha podido realizar gracias a la financiación de los proyectos del Ministerio de Ciencia e Innovación de España CGL2017-85191-P, PID2020-115259CB-100, PRE2018-086304 y de FICYT IDI/2021/000075.