La Universidá d'Uviéu y la so spin-off Plexigrid reforzaron la so collaboración por aciu la entrada de la Universidá d'Uviéu nel accionariado de la compañía. Plexigrid desenvuelve soluciones de software que dexen unu usu más eficiente de la rede eléctrica para xestionar meyor la demanda. La empresa, magar la so recién creación en 2020, yá atropa un bon númberu de veceros en siete países y, en 2023, foi incluyida na llista SET100 start-up Energy Transition como una de les 100 compañíes más innovadores en tecnoloxía enerxética y climática. 

Anque yá s'estableciera un conveniu de collaboración nel ámbitu de la xestión enerxética y l'operación de redes eléctriques al traviés de la Fundación Universidá d'Uviéu n'agostu de 2020, la entrada de la Universidá d'Uviéu nel accionariado va reforzar esta collaboración, lo que va dexar a la institución formar parte del conseyu d'alministración de la empresa al traviés d'unu de los cofundadores de la compañía, el catedráticu d'Inxeniería Eléctrica de la Universidá d'Uviéu Pablo Arboleya.

La entrada de la institución académica nel accionariado de la empresa oficializóse esta mesma selmana cola firma del alcuerdu ente la universidá y la spin-off. Pa los cofundadores de la empresa Alberto Méndez y Pablo Arboleya, la entrada supon un “finxu bien importante”, yá que refuerza inda más la collaboración ente la empresa y l'institución, que foi bien estrecha mientres estos postreros 3 años, lo que va dexar siguir cola llínea de tresferencia tecnolóxica y l'accesu al talentu de la institución. La firma supon tamién un llogru importante pa la Universidá d'Uviéu que recueye los frutos de la so política de incentivación de la tresferencia de conocencia por aciu la xeneración d'empreses de tipu spin-off.

¿Cuál ye'l problema que resuelve Plexigrid?

Anguaño asistimos a un procesu d'electrificación nel que vemos como los costos de los vehículos eléctricos, paneles fotovoltaicos, bombes de calor o sistemes d'almacenamientu eléctricu basaos en bateríes mengüen añu tres d'añu. Per otru llau, reparamos otru enclín mundial que ye l'aumentu del costu de la distribución d'eletricidá derivada d'una rede cada vez más estresada pola instalación masiva d'esti tipu de dispositivos. Esta situación esplica qu'en munchos países el preciu que paga'l consumidor final pol usu de la rede sía inclusive cimera al preciu que paga pola enerxía qu'utiliza. 

¿Cuál ye la solución que propón Plexigrid?

Plexigrid propón revertir la situación mentada enantes y que la distribución eléctrica nun sía xuna barrera pa la transición enerxética, sinón tolo contrario, apurriendo xuna solución que dexe l'esplegue masivu d'estos dispositivos ensin qu'ello suponga xuna necesidá d'inversión masiva n'infraestructura de rede qu'alce'l costu pal consumidor final. Pa ello, la empresa ufierta l'esplegue d'un software qu'apurre al operador de la rede lo qu'esta spin-off denomina los trés superpoderes.
Superpoder1: capacidá pa controlar en tiempu real lo qu'asocede na rede. 
Superpoder 2: capacidá d'esplegar analises avanzaos en tiempu real. 
Superpoder 3: capacidá pa xestionar millones de vehículos eléctricos, paneles fotovoltaicos, bombes de calor y otros dispositivos en tiempu real ya inclusive por aciu analises.

Trayectoria de collaboración cola universidá

El mesmu añu de la so creación (2020), Plexigrid y l'universidá roblaron un conveniu pa fomentar la collaboración nel ámbitu de la xestión enerxética y l'operación de redes eléctriques al traviés de la Fundación Universidá d'Uviéu. Nesti conveniu, proponíense como oxetivos la realización de proyectos d'investigación conxuntos, la tresferencia de conocencia, les práctiques d'alumnos de la institución y la participación de la empresa na dirección de trabajo fin de grau, fin de máster y tesis doctorales. 

De magar, dambes instituciones, arreyando al grupu d'investigación LEMUR de la Universidá d'Uviéu, participaron en más de 15 proyectos ente proyectos de financiamientu públicu y financiamientu priváu con un presupuestu pa la institución que supera llargamente'l mediu millón d'euros. Dirixiéronse 11 trabajo fin de máster de forma conxunta con alumnos realizando práctiques n'empresa y, anguaño, la empresa financia a cinco estudiantes de doctoráu. Amás, más d'una decena d'alumnos egresados de los másteres en conversión d'enerxía eléctrica y sistemes de potencia y el máster Erasmus Mundus en tresporte sostenible y sistemes de potencia trabayen anguaño na empresa y publicáronse de forma conxunta un total de 12 artículos científicos. 

Collaboración de futuru

Cola entrada de la Universidá d'Uviéu nel accionariado de Plexigrid, pretende reforzase entá más si cabo esta collaboración, al aportar la institución académica representada por Pablo Arboleya, catedráticu d'inxeniería eléctrica y sociu cofundador de Plexigrid, al conseyu d'alministración de la empresa. Amás de siguir coles llínees de collaboración esistentes, dambes instituciones van collaborar pa la creación d'un llaboratoriu de referencia internacional onde se va esplegar tecnoloxía que va dexar definir el centru de control eléctricu del futuru.