Irene Corral y Sergio Sanjurjo, estudiantes de la Facultá de Ciencies de la Universidá d'Uviéu, ganaron el concursu internacional de modelización matemática qu'entama l'Institutu de Matemática Interdisciplinar en collaboración cola Universidá Complutense de Madrid y la Sociedá Española de Matemática Aplicada. Dambos estudiantes, que cursen el doble grau de Física y Matemátiques na institución académica asturiana, impunxéronse a los otros cinco equipos que llegaron a la final del certame. 

Los seis equipos finalistes que participaron nel concursu tuvieron que resolver, nun plazu de cuatro díes, un problema matemáticu para optimizar un aterrizaxe vertical de precisión d'un cohete espacial. Esti desafíu foi propuestu por José Manuel González, profesor de la Universidá de Málaga. Los dos estudiantes de la Universidá d'Uviéu llograron la mayor puntuación y la so solución va ser publicada llueu en Boletín del Institutu de Matemática Interdisciplinar. 

Irene Corral y Sergio Sanjurjo, estudiantes de quintu cursu del doble grau Física y Matemátiques, presentárense nos cuatro últimes ediciones del concursu y siempres quedaron ente los equipos finalistes.  A falta d'unos meses pa graduase, Sergio Sanjurjo tien pensáu, una vegada remataos los sos estudios, siguir la so formación fora d'España ampliando les sos conocencies en Matemátiques y Física Teórica. Irene Corral, pela so parte, entá ta valorando qué pasos siguir, pero tien claro qu'el so desenvolvimientu profesional va centrase, principalmente, na caña de les Matemátiques.

Los otros cinco equipos finalistes proveníen de les universidaes Complutense de Madrid (dos d'ellos), Autónoma de Madrid (dos d'ellos) y Carlos III. Caúna de les universidaes participantes nel certame evaluó los exercicios de los distintu grupos ensin conocer la so autoría pa unvialos finalmente al comité evaluador central que falló a favor del equipu asturianu.