El Grupu d'Investigación Finances y Gobiernu Corporativu de la Universidá d'Uviéu llogró'l Premiu Finances para Toos a la meyor iniciativa d'educación financiera. Estos galardones, otorgaos pol Bancu d'España, la Comisión Nacional del Mercáu de Valores y el Ministeriu d'Asuntos Económicos y Tresformamientu Dixital, pretenden reconocer cada añu'l llabor d'aquelles instituciones o persones físiques qu'amosaron una dedicación y compromisu escepcionales nel ámbitu de la educación financiera. El investigadores que participaron nesta iniciativa son Silvia Gómez Ansón y Irma Martínez García. 

El proyectu premiáu, FinEduca360, tien como oxetivu sirvir a la sociedá fomentando la educación financiera al traviés de los trés funciones de la universidá: la docencia, la investigación y la tresferencia de conocencies. La iniciativa integra diverses actividaes destinaes a distintos colectivos: neños, nuevos, families, universitarios y docentes d'universidaes y d'otros niveles educativos. El xuráu destacó la creatividá nel desenvolvimientu de les actividaes, l'eleváu algame social al arreyar a distintos actores, instituciones y organismos, según l'analís d'impactu realizáu de caúna de les actividaes.

Silvia Gómez Ansón ye caderalga d'Economía Financiera de la Universidá d'Uviéu y directora del Grupu d'Investigación Finances y Gobiernu Corporativa. Autora de numberoses publicaciones científiques, cuenta con cuatro sexenios d'investigación y un sexeniu de tresferencia. Foi profesora convidada n'universidá alemanes (Otto von Guericke Universität Magdeburg y Europa Universität Viadrina) ya italianes (Università degli Studi di Torino) y actúa como espertu para l'Axencia Executiva Europea d'Educación y Cultura (EACEA) y l'Axencia Executiva Europea d'Investigación (REA). 

Irma Martínez García ye profesora ayudante doctora nel Departamentu d'Alministración d'Empreses de la Universidá d'Uviéu. Ente 2019 y 2021, antes d'incorporase a la universidá asturiana, desenvolvió la so actividá investigadora nel Departamentu d'Estudios y Estadístiques de la Comisión Nacional del Mercáu de Valores (CNMV). Realizó estancies d'investigación en distintes universidaes estranxeres (Europa Universität Viadrina, Alemaña, American University of Sharjah, EAU, y American University, EEXX) 

Xuntu al equipu de la Universidá d'Uviéu, tamién foi galardonada la candidatura presentada por UNESPA, nesti casu na categoría de implementación del Plan d'Educación Financiera. El so proyectu, Tamos Seguros, tien como oxetivu averar y dar a conocer el seguru y promover la cultura aseguradora ente la ciudadanía. Los premios van ser apurríos el próximu 2 d'ochobre, nel actu central del Día de la Educación Financiera, que se celebra en Sevilla.