La moza artista ovetense Sara Canteli esibe na Universidá d'Uviéu Pie de obra: Anexo, un percorríu por una trentena de creaciones de los sos distintos proyectos, executaos na última década; n'una amuesa qu'esta esposición dexa al visitante averase a la creación d'una nueva, sólida y resuelta artista que realiza na so obra una tresposición casi lliteral de les idees y sensaciones qu'abonden nel so interior. La exhibición, que puede visitase na Sala d'Esposiciones del Edificiu Históricu hasta'l próximu 27 d'agostu, va ser inaugurada esta tarde cola presencia de la mesma artista, que va tar acompañada por María Pilar García Cuetos, vicerrectora d'Estensión Universitaria y Proyección Cultural, y Julia Barroso Villar, catedrática d'Hestoria del Arte de la Universidá d'Uviéu y comisaria de l'amuesa.

Quien alleguen a la Sala d'Esposiciones de la universidá asturiana van poder esfrutar, como recueye nel catálogu la profesora Barrosu, d'un percorríu d'una década “poles distintes colección de Sara Canteli, nacíes como proyectos puntuales y socesivos que s'encadenen no fondero, cuidao que esta artista busca darréu crear el so estilu y ser fiel al mesmu, lo que paradójicamente, oblíga-y a buscar caminos diverxentes nes maneres d'espresión hasta poder determinar cuál siente como so”. 

La vicerrectora d'Estensión Universitaria y Proyección Cultural destaca que Sara Canteli, (Uviéu, 1999); “busca col so arte espresar esa nueva visión del mundu y apéllanos sobre'l sentíu de la vida”. García Cuetos señala que “el so maduror anicia nesa temprana relación cola espresión artística y nútrese d'una creatividá que se valoró y fomentó como una pilastra de la mesma identidá. Ella mesma afirma que cree nel arte como un procesu, un camín, como xuna tresmisión de vivencies que s'afiguren en formes y colores”.

Nesti sentíu, la vicerrectora d'Estensión Universitaria y Proyección Cutural, señala que l'arte de Sara Canteli ye un testimoniu vital y xuna materialización de la so filosofía. “Pretende apellar a quien s'enfrenten a la so obra ya integralos en reflexones que son al empar individuales y colectives”. Sara Canteli propón, na Universidá d'Uviéu, xuna esperiencia integral, tanto estética como ética y amuesa les sos reflexones, les sos idees y los sos compromisos cola humanidá, les muyeres, la naturaleza.

Nel percorríu de daqué más d'una trentena d'obres, pueden reparase les sos primeres creaciones, como Eclosión (2013); pieces de la so colección Magma (2016), Cuadradura (Trampa) (2018); Rede Moon (2018); la serie Pandora (2019),  Cinema Paradiso (2020), Cantábricu (2021) o Pieles (2022).