Estos remolinos, denominaos testures magnétiques, resulten de gran interés para la industria pol so potencial nel desenvolvimientu de memories magnétiques más rápides y eficientes que les actuales | L'estudiu, realizáu en collaboración col CINN y el Sincrotrón Alba, publicóse apocayá na revista ‘Communications Physics’, de máximu impactu na so área de la conocencia
Al mirar l'agua que baxa por un regueru podemos ver pequenos remolinos qu'abasna la corriente y que se faen o desfaen según van baxando pol calce. N'una pista de material magnético, tamién ye posible xenerar remolinos magnéticos, llamaos testures magnétiques, y emburrialos con una corriente eléctrica a gran velocidá. Un aspeutu clave na tresmisión fiable d'información ye qu'estos remolinos magnéticos permanezan estables y podamos cuntalos ún per ún, lo que se consigue al traviés de la carga topolóxica de cada testura. Un grupu d'investigadores de la Universidá d'Uviéu, el Centru d'Investigación en Nanomateriales y Nanotecnología y el Sincrotrón Alba pudo visualizar remolinos magnéticos 3D, llamaos puntos de Bloch, y los distintos vórtices magnéticos que los conecten n'una microestructura de permaloy faciendo midíes precises de la so carga topolóxica. El trabayu foi publicáu en Communications Physics, una revista de máximu impactu na so área de conocencia.
María Vélez, catedrática de Física de la Universidá d'Uviéu, esplica que, nesti estudiu, el investigadores utilizaron un microscopiu de rayos X de la llínea Mistral del Sincrotrón ALBA en Barcelona para llograr imaxes magnétiques en 3D a partir del analís de series d'imaxes de microscopía magnética de rayos X. Para ello, emplegaron técniques de reconstrucción de tomografía vectorial, similares a les tomografíes médiques tipu TAC, pero con sensibilidá magnética y resolvimientu na nanoescala.
La profesora de la Universidá d'Uviéu y firmante del artículu destaca que se trata d'un desenvolvimientu tecnolóxicu “de gran interés” nun momentu nel que la comunidá científica y l'industria de grabación magnética tán trabayando nel desenvolvimientu de memories magnétiques 3D “con una mayor capacidá d'almacenamientu que los discos duros 2D habituales y nes que los defectos topolóxicos magnéticos xueguen un papel clave nel espardimientu de la información de manera rápida y estable”.
Referencia
Hermosa, J., Hierro-Rodríguez, A., Quirós, C. et al. Bloch points and topological dipoles observed by X-ray vector magnetic tomography in a ferromagnetic microstructure. Commun Phys 6, 49 (2023). https://doi.org/10.1038/s42005-023-01162-8
