Los galardones estremen a 60 de los participantes na encuesta sobro vezos de movilidá que tien, ente los sos oxetivos, definir el Plan de Movilidá Segura y Sostenible na institución académica | L'estudiu, dirixíu a tola comunidá universitaria, realizóse online ente los meses de marzu y mayu de 2024 y rellenáronse 2778 cuestionarios
La Sala de Xuntes del Aulariu Sur del Campus de Xixón acoyó esta mañana la entrega de los premios de la encuesta sobro vezos de movilidá Conecta cola to Universidá. Muévite con Sostenibilidá. Resultaron premiaes 60 persones -- 30 recibieron les tarxetes CONECTA por importe de 30 euros y otres 30 llograron tarxetes regalo por importe de 50 euros de Amazon--. L'actu d'entrega de premios cuntó cola participación de María José Suárez, directora d'Área d'Eficiencia Enerxética, Sostenibilidá y Mediu Ambiente de la Universidá d'Uviéu; Cristina López, José Manuel Montes, Marta María Vidal y Laura Calzada, responsables de la encuesta sobro los comportamientos, vezos y percepciones de la movilidá cotidiana de la comunidá universitaria n'Asturies (EM-UNIOVI); y Cristina Ortega, responsable de la Área Customer Insights, en representación de ALSA, entidá financiadora del proyectu d'investigación TuNosMueves, nel que s'enmarca la encuesta.
Los galardones inclúyense dientro de la estratexa del Vicerrectorado de Sostenibilidá y Digitalización de la Universidá d'Uviéu pa promover la participación na encuesta sobro vezos de movilidá de toa nuesa comunidá universitaria. Esta encuesta ye d'utilidá pa definir el Plan de Movilidá Segura y Sostenible na universidá que dexe llograr el Sellu Asturianu de Movilidá Segura na Empresa, promovido pol Institutu Asturianu de Prevención de Riesgos Llaborales y la Xefatura Provincial de Tráficu, dientro de la iniciativa de Movilidá Segura y Sostenible de la Dirección Xeneral de Tráficu.
Amás, la encuesta contribúi a identificar les debilidaes y necesidaes, en términos de movilidá, de la comunidá universitaria, según a valorar les posibilidaes de meyora incorporando nueves rutes y maneres de tresporte escontra y ente los distintos Campus de la Universidá d'Uviéu, col propósitu de promover l'usu de maneres de tresporte sostenibles y el tresporte públicu intermodal.
La encuesta, dirixida a tola comunidá universitaria, realizóse online ente los meses de marzu y mayu de 2024. Recibiéronse 2778 cuestionarios. Amás, 773 persones manifestaron la so disposición a participar n'otres actividaes (talleres de cocreación, dinámiques de grupu) p'ameyorar la movilidá na rexón.
El Vicerrectorado de Sostenibilidá y Digitalización de la Universidá d'Uviéu treslladó'l so agradecimientu a la comunidá universitaria por participar y tamién el trabayu desenvueltu polos integrantes del equipu responsable de la Encuesta sobro los comportamientos, vezos y percepciones de la movilidá cotidiana de la comunidá universitaria n'Asturies (EM-UNIOVI), el profesores del Departamentu d'Alministración de Empresa Laura Calzada, Cristina López, José Manuel Montes y Marta Vidal, según la collaboración del Consorciu de Tresportes d'Asturies (CTA) y de la empresa ALSA, entidá financiadora del estudiu nel marcu del proyectu d'investigación TuNosMueves.
