El Grupu 9 d'Universidaes (G-9) reafitó'l so compromisu cola meyora continua de los procesos d'almisión d'estudiantáu; un esfuerzu que s'allinia coles disposiciones establecíes nel Real Decretu y les recién directrices de la Conferencia de Rectores de les Universidaes Españoles (CRUE).

Na xunta de la Comisión Sectorial d'Estudiantes, celebrada esta selmana na Universidá d'Uviéu, presidida por Juan Carlos Ayala, rector de la Universidá de La Rioxa, los responsables de los vicerrectorados d'Estudiantes conocieron les meyores del grupu de trabayu d'Almisión del G-9 que ta actuando coordinadamente por que la Prueba d'Accesu a la Universidá (PAU) de caúna de les sos universidaes s'axuste a los criterios aprobaos por CRUE. 

Mientres la xunta, celebróse tamién un alcuentru con representantes de los conseyos d'estudiantes de les universidaes del G-9, constituyíos apocayá como asociación. Aldericóse la posibilidá d'un trabayu conxuntu más estrechu y esquizar víes para una futura collaboración formalizada al traviés de convenios. 

Per otra parte, presentóse'l balance de la participación del alumnáu de les universidaes públiques del Grupu nos Cursos Europeos de Branu, entamaos por Equipu Europa y la Fundación Diariu de Navarra, cola collaboración del G-9. Los cursos, que cuntaron con ponentes del grupu y ufierten reconocencia de creitos, son un reflexu del enfoque del G-9 escontra la internacionalización y la collaboración con otres entidaes, d'acordies con la comisión sectorial. 

Los integrantes de la comisión, que fueron recibíos por Ignacio Villaverde y Alfonso López Muñiz, rector y vicerrector d'Estudiantes y Empleabilidá de la Universidá d'Uviéu, respectivamente, aldericaron, amás, sobro los puntos que tienen d'encetase nos planes de participación estudiantil y de les esperiencies innovadores nel ámbitu estudiantil que se tán llevando a cabu o podríen ponese en marcha nes universidaes del G-9.