Les diez universidaes europees integraes na alianza Ingenum aprobaron ayeri, na xunta celebrada nel marcu del Conseyu de l'Alianza en Chieti-Pescara, les cinco titulaciones nes que van empezar a trabayar pa potenciar la so ufierta académica conxunta. En concretu, dieron el vistu bonu al que va ser el primer grau européu de l'alianza, que va tratar sobre emprendimiento ya innovación, según a cinco másteres en materia de rehabilitación médica, intelixencia artificial, química y sostenibilidá. Amás, el rectores presentes, presidíos pol rector de la Universidá d'Uviéu, Ignacio Villaverde, consensuaron empecipiar el procesu pa dotar Ingenium d'entidá llegal. Pa ello, empieza agora un periodu d'analís y consultes de caúna de les universidaes socies, que van evaluar internamente el modelu d'Agrupación Europea de Cooperación Territorial.

Pa la elección de les primeres titulaciones conxuntes, el rectores de les diez universidaes que formen parte de l'alianza europea tuvieron en cuenta aquelles cañes de conocencia que cunten con presencia nun mayor númberu d'instituciones. Tres esti alcuerdu, les universidaes socies van empecipiar el procesu p'analizar les posibles víes de implementación d'estes titulaciones conxuntes, arreyando al mayor númberu d'instituciones posible. En concretu, les titulaciones escoyíes inclúin el primer grau européu Ingenium, sobre emprendimiento ya innovación y que surde d'una propuesta de la universidá alemana de Ciencies Aplicaes de Karlsruhe. Tocantes a los estudios de posgrado, va trabayar na puesta en marcha de cuatro másteres, que se van enmarcar nes siguientes materies:la rehabilitación médica, la intelixencia artificial, la química y la sostenibilidá. 

“Estes titulaciones van priorizase y van considerase estratéxiques pa l'Alianza, pero van caminar de forma paralela a otros programes d'estudios que yá tán desenvueltos o a puntu de rematar con presencia de dos o más universidaes socies y que se van incluyir na ufierta académica de l'alianza”, esplicó Ignacio Villaverde. Exemplu d'esto son el Máster Erasmus Mundus en Mecatrónica; el grau en Derechu Internacional; el máster en Ciencies Cognitives o'l de Bienestar, desenvueltos de forma conxunta por dos o más universidaes Ingenium. 

Entidá llegal

Resolver cuálos diben ser los primeros pasos pa escoyer la entidá llegal de l'alianza yera una de les cuestiones del orde del día del Conseyu. La opción que gana enteros ye la de constituyise como Agrupación Europea de Cooperación Territorial, una forma llegal que, tal que esplicó Ignacio Villaverde, “asitiaría de forma inmediata a Ingenium como una alianza comprometida cola cooperación rexonal europea y l'educación transnacional tresformadora”. Esta entidá dexaría que Ingenium actúe de vehículu p'aumentar la participación de les rexones nes que tán establecíes les diez universidaes que la conformen. 

L'alcuerdu alcanzáu encomienda a caúna de les universidaes socies qu'analicen de forma interna, nel marcu de los sos órganos de gobiernu y de la so lexislación nacional, la posibilidá d'optar por esta forma xurídica y los pasos que tienen de dar pa ello. Tou ello fadrá cuntando col sofitu de la universidá coordinadora y el secretariáu técnicu de l'alianza, que van emponer el procesu. 

Proyectu de llanzamientu d'un nanosatélite

Tocantes a la propuesta de proyectu de llanzamientu d'un nanosatélite de Ingenium, promovido pola Munster Technological University, el rectores presentes nel Conseyu de l'Alianza decidieron que caúna de les universidaes que formen parte de l'alianza van enriar el proyectu al traviés d'aquellos grupos d'investigación que manifiesten el so interés en sumase a esti proyectu. Una vegada conocíu l'interés qu'esti proyectu espierta nos grupos d'investigación del consorciu, va trabayar pa ellaborar un proyectu conxuntu. 

Firma de los principios de Campus Saludable y la Carta de Equidad ya Inclusión

Per otra parte, les universidaes socies roblaron nel alcuentru de Chieti-Pescara los principios de Campus Saludable, diseñaos pa cumplir oxetivos como reconocer la responsabilidá colectiva d'abogar polo entendío na Carta de Okanagan pa Universidaes y Colexos Promotores de la Salú, esforciase por crear redolaes de sofitu nel campus que conduzan a una vida saludable, crear una cultura de bienestar y, a lo último, sofitar una perspectiva integral de cada universidá pa la salú y el bienestar. 

Asina mesmu, el rectores tamién sellaron la carta de Equidad ya Inclusión, coles mires de cumplir un decálogu que meyora escontra la inclusión y la equidad con una lente más amplia y interseccional. Dalgún d'estos principios pasen por apurrir oportunidaes d'educación y capacitación continues pa crear conciencia, conocencies y habilidaes rellacionaes cola equidad, la diversidá y l'inclusión, tanto pa estudiantáu como pa PDI y PTGAS; integrar los principios de equidad, diversidá ya inclusión nos planes d'estudios; adoptar práctiques inclusives na contratación y la retención de talentu, o participar viviegamente coles comunidaes locales, nacionales y globales pa promover la equidad.